Tabhi Tarun ne darte darte dhire se kaha, yeh... yeh koi normal drone nahi hai. Uske hathon mein jo takat thi, wo is lohe ki makdi ke samne kamzor lag rahi thi.
"Wahi is shahar ka system manager hai is episode ke liye, " Anurag ne Ghost Eye mein dekh karke bataya. Woh jo uski peeth par green tank hai, wahi is poore sector ka main source hai. Agar hamne use fod diya, toh is shahar ke sare drones ek hi baar mein crash ho jayega. Tabhi poore warehouse ke speaker mein ek zor ki aawaz aayi.
Un sabhi ke phones ek sath vibrate hue. Anurag ne apna phone nikala. Screen par creator Joya ka wahi sukoon bhara face dikh raha tha, par usne is baar ek naya mazak kiya.
Anurag... Kya mujhe tumhein 'the glitch' kehna chahiye? Joya ki aawaz pure warehouse ke speaker mein gunj rahi thi, jisse niche kaam kar rahe drones ek second ke liye ruk gaye. Tumne socha ki Shreya tumhe chup chaap yahan le aayegi aur mujhe pata hi nahi chalega. Maine is game ko banaya hai. Is duniya mai mere liye koi raaz nahi hai.
Anurag ka dimag alert ho gaya. Usne turant piche mudkar Shreya ki taraf dekha, lekin Shreya khud dari hui thi. Fir Joya ne hanste hue kaha, Shreya ne tumhe dhoka nahi diya hai, Anurag. Wo bechari toh sach mein apne bhai ka badla lena chahti hai. Lekin usne tumhe maut ke kuen par la kar khada kar diya hai. Ab dekhte hain ki tum episode 2 ke boss ke samne kaise jinda bachte ho. Joya ne ye bolkar turant call cut kar diya.
Joya ke call cut karte hi, spider ne apna sir sidhe upar ki taraf ghumaya jahan wo pancho chipe hue the. Usne apna ek bhari mechanical leg hawa mein uthaya aur puri takat se unke grill par laat mara. Lohe ka gill ek hi jhatke mein toot gaya. Anurag aur uske friends do manzil ki unchai se sidhe niche factory ke lohe ke floor par ja gire.
Anurag zameen par girte hi khud ko roll kiya taki use jyada chot na lage, lekin uske jis hath par patti bandhi hui thi us par phir se zor se chot laga. Usne turant apna Ghost Eye ko active kiya. Uski vision badal gayi, lekin is baar boss ka body itna advanced tha ki Ghost Eye ki madad se uske body ke andar ke weak points nazar nahi aa rahi thi.
Boss Spider ke aankhon se nikalne wali 8 green laser lines ab sidhe un charon par focus ho rahi thi. Tabhi Anurag ne chillakar kaha, Suraj! Tarun! Ise roko. Ise aage badhne mat do. Fir usne apni Blood Dagger ko nikala jiska blade ab dushman ki nafrat se bahut tez ho chuka tha. Usne Aira aur Shreya se kaha, Shreya, tum iske network ko suppress karne ka rasta dhundo. Aur Aira tum apne modified liquid se hamari protection shield ready karo.
Boss Spider ne ek bhayanak aawaz nikali aur uske pairon se do ghumte hue blades nikale jo zameen ko chirte hue poore speed se Suraj aur Tarun ki taraf ja rahe the. Suraj apna kadam piche karne laga, tabhi Tarun ne use kaha, piche mat hato Suraj. Agar hum piche hatne lage toh yeh sabko kuchal dega. Uske body ki bachi kuchi energy uske haathon mein ikattha ho rahi thi.
Suraj ne ek gehri saans li or apne dono kaale lohe ke haathon ko aage badhakar un ghumte hue blades ko pakad liya. Ek bhayanak aawaz nikli aur chingari pure warehouse mein fail gaya. Suraj ke hathon ki skin blur hone lagi thi aur dard se uski chikhein nikalne lagi thi. Lekin usne blades ko nahi choda. Usne apni pure taqat laga kar us blade ko mod diya aur laat maar kar chitka diya, jisse wo blade Spider ke apne hi pair mein lag gaya. Spider ka ek pair tut kar alag ho gaya or uske andar se green chemicals ka fauwwara nikalne laga. Spider ne dard se chillaya. Tabhi Tarun is mauke ka fayda uthaya or dusre taraf se kud kar spider ke dusre leg par hamla kiya. Spider ka dusra lohe ka pair bhi jad se ukhad gaya. Lekin Tarun ke pairon mein zor daar moch aa gayi aur wo zameen par baith kar kehrane laga.
Anurag ne Shreya ko ishara kiya, uska dimag bilkul alert tha. Shreya ne aage badhkar apne bade mechanical wrench ko warehouse ke main control system par maara. Control system kuchh der ke liye freeze ho gaya. Shreya ka wrench se ek blue green mix color ka current nikla jo wire ke through Boss Spider ke dimag mein chala gaya. Spider ka uncha pahad jaisa body ek dam se freeze ho gaya.
Anurag ne turant apni Ghost Eye ko active kiya aur usne dekha ki spider ke piche jo tank tha, uske main center par uski saari energy thi.
[3... 2... 1...]
Anurag apne left hand mein Gravel ko pakda aur right hand mein Blood Dagger ko. Aur wo tezi se spider ke tute pairon par chadte hue sidhe upar chad gaya. Uska zakhmi hath bahot dard kar raha tha, lekin is waqt zindagi or maut ka Sawal tha. Anurag ne pehle Gravel ko us tank par maara jisse ek choti si shockwave nikli or tank ka glass halka sa Crack ho gaya, fir usne apni Blood Dagger ko us crack ke andar ghusa kar main energy point ke andar dhasa diya.
Blood Dagger ke touch hote hi tank ke andar ka green liquid nikla or Bhayanak blast hua. Tank ke fut-te hi pure factory mein green light wave phail gayi. Spider ka body andar se fatne laga or uske sare metallic parts tut kar zameen par gir gaye. Factory ke bahar jo hazaron drones thi, wo sab achanak hi shant ho gayi. Sare drones bina power ke zameen par gir kar mar gaye.
Lekin blast hote hi Anurag ko jhatka laga aur wo door jakar gir gaya. Use or bhi chot lag gayi aur uske jakhmi hath mein jalan hone laga. Tab Aira turant aage badhi or apna modified liquid us par chidki, taki uske body ke dard normal ho jaye.