Ye kahani ek aisi ladki ki hai jiska janm hua toh ek aise parivar mein tha jaha sare rishte maujood the, kisi bhi rishte ki kami nahi thi. Ek aadhyatmik aur gharelu maa, har zarurat ko puri karne wale pita, badi behne jo har tarah ki khwaish ko pura karti, ek badi maa jo maa se bhi badhkar pyar karti, bade papa jo roz sham ko daftar se aate samay samose aur jalebi le kar aate the, chacha aur chachi jo dil khol ke pyar lutaya karte the, chachere bhai aur behn jo apni choti behan ko jaan se zayada dular karte the. Ek aisa parivar jisme 15 log raha karte the, sath mein khana saath mein sare tyohar manana, ek doosre ki khushi mei khush hona aur gham mei sath mei rona. Wo kehte hai na ek complete joint family, ye kahani bhi ek aise hi parivar ki hai. Sab kuch acha chal raha tha, sab bahut khush the sath me ke achanak se hi uss pure parivar ki khushiyon ko jaise kisi ki nazar lag gayi, ek hi pal me ek aisa vaky hua jiske wajah se pura parivar jaise bikhar gaya, woh parivar jo sath me sare utsav manaya karta tha, us ek vakya ne jaise un sb ko alag kar diya. Jo parivar ek sath baith ke khushi se khana khaya karta tha, aaj wahi parivar ka ek ek sadsy jaise apne apne kamre me hi mehfooz ho gaya ho. Jaise ek zor ki aandhi aai aur sab kuch bikher kar chali gayi. Kabhi shayad kisi ne bhi aisa socha tak nahi hoga ke jeevan mein unhe aisa pal aur itna dukh dekhna padega. Ghar ki buzurg, ek pyari si, sab bacchon par jaan chidakne wali dadi aur sabko ek sath bitha kar raat ko kahaniyan sunane wale dada ji, jinhone kitne saal laga diye, ek eent patthar ke makan ko ghar banane mein, aaj woh apni hi dhundli aankhon se uss ghar ko bikharte hue dekh rahe hain. Aakhir ek doosre par itni jaan chidhakne wale aur ek doosre ke liye jaan dene wale aaj kaise ek doosre ki jaan ke dushman ban gaye? Ek doosre se jude hue pyar ke rishtey ek pal mein kaise bikhar gaye?
Iss sawal ka jawab aapko milega next chapter mein