Waqt kisi ke liye nahi rukta...
Dheere-dheere sab kuch normal hone laga. Lockdown bhi khatam ho gaya aur Ania ne apni 11th aur 12th ki padhai ke liye ek naye school mein admission le liya.
Naya school...
Naye teachers...
Aur naye dost...
Shuru-shuru mein Ania ko sab kuch ajeeb lagta tha. Use apne purane school aur doston ki bahut yaad aati thi. Lekin dheere-dheere woh sabke saath ghul-mil gayi.
Unhi doston mein se ek thi Sabnam.
Sabnam aur Ania ki dosti kuch hi dino mein kaafi gehri ho gayi.
Ek din lunch break ke waqt Sabnam ne Ania se muskurate hue kaha—
Sabnam: "Ania, mera ek dost hai... use tum bahut pasand aayi ho. Kya tum usse baat karogi?"
Ania thodi muskura di.
Ania: "Achha? Pehle uski photo dikhao."
Sabnam ne turant phone nikala aur uski photo dikhayi.
Ania kuch der tak photo dekhti rahi.
Ania: "Hmm... theek hai. Pehle baat karke dekhte hain."
Sabnam khush ho gayi.
Sabnam: "Theek hai, main usse bata deti hoon."
Ania: "Waise uska naam kya hai?"
Sabnam apne sir par haath rakhkar hans padi.
Sabnam: "Arre haan! Naam batana hi bhool gayi. Uska naam Ariz hai."
Ania: "Oh... achha."
Us din ke baad Ania aur Ariz ki baat-cheet shuru ho gayi.
Dheere-dheere dono ek doosre ko samajhne lage aur phir unka rishta relationship mein badal gaya.
Us waqt saal 2021 tha.
27 October 2021...
Ye wahi din tha jab Ania ne Ariz par bharosa karke apni zindagi ka ek naya safar shuru kiya.
Shuru-shuru mein sab kuch bahut achha chal raha tha.
Ania apni padhai par bhi dhyan de rahi thi aur Ariz ke saath bhi khush thi.
Uska sapna engineer banne ka tha.
Isliye usne Polytechnic ka entrance exam bhi diya.
Lekin sirf 2 marks kam hone ki wajah se uska admission nahi ho saka.
Ye baat uske liye bahut dukh bhari thi.
Lekin usne himmat nahi haari.
Usne doosri jagah admission liya aur apni padhai jaari rakhi.
Ariz uske school ka student nahi tha, kyunki Ania girls school mein padhti thi.
Dono kabhi-kabhi school ke baad mil liya karte the.
Ek din school se wapas aate waqt achanak Ania ki mulaqat usi ladke se ho gayi...
Wahi ladka...
Jisne Class 10 mein uski zindagi ko narak bana diya tha.
Woh apne kuch doston ke saath khada tha aur phir se Ania ko pareshan karne laga.
Ania dar gayi.
Usne turant apne bhai ko phone kiya.
Lekin jab tak uska bhai wahan pahunchta, woh ladka apne doston ke saath wahan se chala gaya.
Ghar pahunchne ke baad Ania ne ye baat Ariz ko batayi.
Ariz: "Kya ye wahi ladka hai jisne tumhare saath itna sab kuch kiya tha?"
Ania: "Haan, Ariz... ye wahi hai."
Ariz kuch der tak khamosh raha.
Phir usne dheere se kaha—
Ariz: "Kaise koi itna bura ho sakta hai? Kisi ki zindagi ke saath aisa kaise khel sakta hai?"
Ania ki aankhen bhar aayi.
Ania: "Ariz... main nahi chahti meri wajah se tum kisi musibat mein pado. Agar meri wajah se tumhe kuch ho gaya to main khud ko kabhi maaf nahi kar paungi."
Ariz halka sa muskura diya.
Ariz: "Pagal ho tum? Aisi baatein dobara mat karna."
Ania chup rahi.
Tab Ariz ne kaha—
Ariz: "Ek kaam karte hain... hum kuch dino tak milna band kar dete hain. Sirf phone par baat karenge."
Ania ne sir hila diya.
Ania: "Theek hai."
Ariz: "Aur ek baat... mujhe chhodne ki baat dobara kabhi mat karna."
Ania bas halka sa muskura di.
Dono ka rishta dheere-dheere aur mazboot hota gaya.
Ariz gusse wala tha, lekin Ania ka bahut khayal rakhta tha.
Aur Ania...
Woh ziddi bhi thi aur bahut emotional bhi.
Ek baar kisi par bharosa kar leti, to poore dil se karti.
Usse lagta tha ki Ariz kabhi uska bharosa nahi todega.
Ania ne apni zindagi ka har sach Ariz ko bata diya tha...
Apna dard...
Apni bimari...
Apna guzra hua kal...
Sab kuch.
Usse yakeen tha...
Ki is baar uska bharosa kabhi nahi tootega.
Lekin...
Kismat ne uske liye kuch aur hi likh rakha tha.
To Be Continued...