Ruh-e-Ishq
Chapter 1 – Ek Chhote Se Shehar Ki Ladki
Hello guys...
Ye kahani hai ek chhote se shehar mein rehne wali ek ladki ki, jiska naam tha Ania.
Ania apni padhai ko lekar bahut serious thi. Uska sirf ek hi sapna tha—apne maa-baap ka naam roshan karna aur zindagi mein kuch ban kar dikhana.
Woh apni chhoti si duniya mein bahut khush rehti thi. Padhai, ghar, dost, khelna aur kabhi-kabhi ghoomne jana... bas yahi uski zindagi thi.
Ania apne ghar ki sabse chhoti aur sabki laadli beti thi. Dil se bahut masoom, emotional aur pyari. Dusron ki madad karna aur sabko khush dekhna uski aadat thi.
Lekin zindagi kab kis mod par badal jaaye... ye koi nahi jaanta.
Us waqt Ania Class 10 mein thi.
Ek din school mein ek ladke ne Ania ko propose kiya.
Ania ne bina soche seedha mana kar diya.
"Sorry... mujhe abhi in sab mein koi interest nahi hai. Mujhe sirf padhai par dhyan dena hai."
Usse laga baat wahi khatam ho jayegi.
Lekin aisa nahi hua.
Woh ladka baar-baar Ania ke peeche aane laga. Ania ne use kai baar samjhaya, mana kiya, gussa bhi hui. Uske doston ne bhi us ladke ko samjhane ki bahut koshish ki.
Kuch din baad woh ladka achanak gayab ho gaya.
Ania ne chain ki saans li.
Usne socha...
"Shayad ab sab theek ho gaya."
Board exams bhi paas aa rahe the, isliye usne dobara sirf padhai par dhyan dena shuru kar diya.
Lekin Ania ki ek aur duniya bhi thi...
Usse novels padhna aur likhna bahut pasand tha.
Uske paas ek chhoti si notebook thi, jisme woh apni zindagi ki har chhoti-badi baat likha karti thi—apni khushiyan, apna dard, apne sapne aur apne ehsaas.
Woh notebook uske liye sirf ek diary nahi thi...
Woh uski poori duniya thi.
Ek din uski Mama ne woh notebook dekh li.
Mama: "Ania, ye kya hai? Isme itni saari baatein kyun likhi hain? Kya school padhne jaati ho ya ye sab karne? Ye sab bilkul faltu cheezein hain."
Ania: "Mama... mujhe likhna bahut pasand hai. Main sirf apni zindagi ke baare mein likhti hoon. Achhi aur buri dono baatein."
Mama ne sakht awaaz mein kaha,
Mama: "Bas! Aaj ke baad ye notebook tumhare bag mein dikhni nahi chahiye. Apni padhai par dhyan do."
Ania ne chupchaap sir jhuka diya.
"Theek hai, Mama..."
Us raat Ania bahut royi.
Gusse aur dard mein usne apni sabse pyari notebook uthai aur nadi mein phenk di.
Notebook paani mein doob gayi...
Lekin uske saath Ania ka ek hissa bhi doob gaya.
Us din usne mehsoos kiya jaise usne apni zindagi ki sabse keemti cheez kho di ho.
Bahut royi...
Lekin phir aansu pochkar dobara padhai mein khud ko vyast kar liya.
Usse bilkul bhi andaaza nahi tha...
Ki uski zindagi ka asli imtehaan abhi shuru bhi nahi hua tha.
To Be Continued...