Nikah ko kuch mahine beet chuke the.
Ania ab Aayan ke ghar mein sabke saath ghul-mil gayi thi.
Woh subah jaldi uthti, Ammi ki madad karti, ghar ka kaam sambhalti aur sabka khayal rakhti.
Aayan door se chup-chaap use dekhta rehta.
Har din uske dil mein Ania ke liye mohabbat aur badhti ja rahi thi.
Lekin Ania...
Woh ab bhi apne dil ke darwaze khol nahi pa rahi thi.
Woh Aayan ki izzat karti thi...
Uski fikr bhi karti thi...
Lekin jo mohabbat Aayan chahta tha, woh abhi tak Ania ke dil mein jagi nahi thi.
Ek shaam Aayan office se lautte waqt Ania ke liye uski pasand ki chocolates aur ek chhoti si diary lekar aaya.
Ania: "Ye sab mere liye?"
Aayan: "Haan."
Ania: "Par kyun?"
Aayan muskura diya.
Aayan: "Tumne bataya tha na... tumhe likhna bahut pasand tha."
"Isliye socha... shayad tum phir se likhna shuru karo."
Diary dekhte hi Ania kuch pal ke liye khamosh ho gayi.
Usse apni woh purani notebook yaad aa gayi...
Jo gusse mein usne nadi mein phenk di thi.
Uski aankhon mein aansu aa gaye.
Aayan ghabra gaya.
Aayan: "I'm sorry... agar meri wajah se tumhe purani baatein yaad aa gayi."
Ania ne aansu ponchhte hue dheere se kaha—
Ania: "Nahi... bas bahut saalon baad kisi ne meri itni chhoti si khwahish yaad rakhi."
Us din ke baad Ania ne us diary mein dobara likhna shuru kiya.
Lekin is baar...
Us diary mein sirf dard nahi tha.
Usmein Aayan ki chhoti-chhoti baatein bhi thi.
Uska care karna...
Bina kahe paani la dena...
Thak jaane par chai bana dena...
Aur har raat sone se pehle bas itna poochna—
"Aaj tum khush thi na?"
Ek din Ania ki tabiyat achanak kharab ho gayi.
Use tez bukhar tha.
Aayan office se seedha ghar aaya.
Usne poori raat Ania ke paas baithkar uska khayal rakha.
Kabhi dawa deta...
Kabhi uske maathe par thandi patti rakhta...
Aur kabhi chupke se Allah se uski sehat ki dua karta.
Subah jab Ania ki aankh khuli...
Usne dekha Aayan kursi par baithe-baithe hi so gaya tha.
Uske haath mein ab bhi Ania ka haath tha.
Ye dekhkar Ania ke dil mein ek ajeeb sa sukoon utar gaya.
Usne dheere se Aayan ka haath pakad liya.
Us pal...
Uske dil ki barf dheere-dheere pighalne lagi.
Usne pehli baar mehsoos kiya...
Ki har insaan dhoka dene wala nahi hota.
Kuch log sirf mohabbat karna jaante hain.
Aur Aayan...
Unhi logon mein se ek tha.
Lekin Ania ko ye nahi pata tha...
Ki kismat un dono ki khushiyon ka imtehaan lene wali thi.
Bahut jald...
Ek aisi sachchai saamne aane wali thi...
Jo unki poori zindagi badal degi.
To Be Continued...